Մեծ Բրիտանիայի գազի պաշարները թագավորությանը կբավականացնեն ընդամենը երկու օր․ Daily Mail
2026-03-09 14:12
National Gas-ի տվյալների համաձայն՝ Թագավորության գազի պաշարները 2025 թվականի 18 հազար ԳՎտ/ժ-ից կտրուկ նվազել են՝ հասնելով 6 700 ԳՎտ/ժ-ի։ Այս ծավալը բավարար է ընդամենը 1,5 օրվա պահանջարկը ծածկելու համար։ Նույնքան պաշար էլ առկա է հեղուկացված բնական գազի (ՀԲԳ/LNG) տեսքով։
Ի տարբերություն Մեծ Բրիտանիայի՝ Եվրոպան շատ ավելի պատրաստված է մատակարարման նմանատիպ տատանումներին։ Եվրոպական պահեստարաններում առկա պաշարները կբավարարեն մի քանի շաբաթ, նշում է գործակալությունը։
Թրեյդերներն օգտվում են Մեծ Բրիտանիայում ստեղծված իրավիճակից և գազի համար ավելի բարձր գներ սահմանում՝ գիտակցելով, որ երկիրն այլընտրանք չունի։ Ինչպես հստակեցնում է Daily Mail-ը, այժմ Մեծ Բրիտանիան գազի դիմաց վճարում է Եվրոպայում ամենաբարձր մեծածախ գինը։
«Բրիտանական գազային հաբում գներն այժմ ավելի բարձր են, քան հոլանդական TTF-ում (եվրոպական գլխավոր հաբը)՝ ներառյալ մինչև մայիսի վերջն ընկած ողջ ժամանակահատվածը։ Մինչ այս շաբաթ Մեծ Բրիտանիայում գազն ավելի էժան էր, քան Եվրամիությունում», — նշել է Argus Media պարբերականի գազի գնագոյացման բաժնի ղեկավար Նատալյա Ֆիլդինգը։
Ըստ նրա՝ սա մասամբ պայմանավորված է այն փաստով, որ Մեծ Բրիտանիայի սուղ պաշարները երկիրն ավելի «խոցելի են դարձնում գնային կտրուկ տատանումների նկատմամբ»։
National Gas-ի տվյալները փաստում են, որ անցած ուրբաթ գազապահեստարանները լցված են եղել իրենց նախկին հզորության ընդամենը 18%-ի չափով, իսկ հեղուկացված բնական գազի (ՀԲԳ) պահեստարանները՝ կիսով չափ։ Ընկերության ներկայացուցչի խոսքով՝ Մեծ Բրիտանիան գազի հիմնական մասը ստանում է Նորվեգիայից և Հյուսիսային ծովում սեփական արդյունահանման հաշվին։
Իրավիճակը սրվել է փետրվարի 28-ին ԱՄՆ-ի և Իսրայելի գործողության մեկնարկից հետո։ Իրանի կողմից հնարավոր պատասխան հարվածների և ոչնչացման վտանգի պատճառով նավթի և բնական գազի տեղափոխմամբ զբաղվող նավերը հայտնվել են թիրախում։